Die lyk in die water

Vier jaar gelede het 'n koeël in die bobeen Alexander Hinkel se kanse om polisiekaptein te word, vernietig. Maar dit het niks aan sy vermoë om deur 'n verdagte se leuens te sien gedoen nie. Inteendeel, sy instink en waarneming is skerper as ooit. Dís waarom sy eks-kollegas steeds aan Hinkel se deur kom klop wanneer hulle vasdraai met ondersoeke. In die stad Agrippa waar misdaad volop is, is daar deesdae meer onopgeloste moorde as wat die polisie kan hanteer, en Hinkel verdien goeie geld uit vryskutspeurwerk. Hy het net één voorwaarde: Hy werk alleen.

Die liggaam van 'n Olimpiese swemmer word in Agrippa se openbare swembad gevind. Maar hoe verdrink 'n vis in die water? Die polisie sit hande in die hare, en Hinkel word ingeroep om die saak te ondersoek. Hierdie keer egter, moet selfs hý erken dat dit dalk 'n raaisel is wat onopgelos gaan bly. Tensy hy sy trots in sy sak steek en Janke Lofstat se hulp gaan vra. Sy ís immers goed met raaisels...

DIE LYK IN DIE WATER is die vierde van 'n reeks Afrikaanse whodunnit-novelles deur bekende skrywer Anna Emm*! Dit is die ideale leesstof vir enigeen met min tyd, want hierdie korter novelles kan elk binne 'n uur of twee gelees word. Dis positiewe, aksiebelaaide stories wat jy met 'n geruste hart ook vir jou tieners kan aangee.

* Kyk uit vir die ander novelles in die HINK-reeks!

Dettagli