Okwangenza Ngahlala e Guta Ra Mwari

Ugwalo lolu luphendula umbuzo engiwubuzwa ngabantu abanengi, wokuthi 'Kanti Khumalo wenzani ebandleni le Guta Ra Mwari, wena ungumtwana webandla labazalwane kuKristu, buya ekhaya, ebandleni elakufundisa ukukholwa.' Okunengi okusegwalweni lolu kuphendula umbuzo wonalo. Abakhumbula ukuthi ukungabi khona kwami ebandleni labazali bami kutsho ukuthi sengalahla imithetho engcwele engayifundiswa ebuntwaneni bami, bayaphosisa kakhulu ngoba khathesi sengiphethe okudlula lokho engangikufundiswe ebuntwaneni bami.
Khathesi sengilolwazi olujulileyo lokuthi uNkulunkulu kuyini, uKristu kuyini, uMoya oyingcwele kuyini, kanye lokuthi umuntu kuyini. Sengikwazi ukuthi imimoya yonke ekhona ezulwini lasemhlabeni yadalwa nguNkulunkulu, emibi lemihle, yonke ilawulwa nguye, uThixo. Sengikwazi njalo ukuthi uNkulunkulu usebenza ngabantu, uMoya Oyingcwele usebenza ngabantu, lokuthi imimoya yonke isebenza ngabantu. Ngitsho lezithunywa zasezulwini zingena ebantwini zisebenze ngabo. Ulwazi lonke lolu yilo engiluhlaleleyo e Guta Ra Mwari.
Ngiphakathi komgodi wolwazi, izinto zakhona zinengi, kazipheli. Kulezifundo ezichasisa ngegwayi lotshwala, lokunye okudakisayo ukuthi kulimaza njani umphefumulo kanye lomzimba womuntu.
Kulezifo ezingelaphekiyo ngemithi yezinyanga kumbe eyezibhedlela ngoba zibangwa yimimoya emibi. Izifo lezi zelatshwa ngoMoya Oyingcwele kuphela.
Okunye okwangenza ngahlala eGuta Ra Mwari yikuphendulwa kwembuzo eyayisehlula izifundiswa zemanyunivesithi. Umbuzo engangilawo yikuthi njengoba uJesu wayenguNkulunkulu, esesimeni somuntu, kwakubangelwa yini ukuthi kwesinye isikhathi ezwakale eseyisa abantu abangayisiwo maJuta, kwesinye isikhathi aze ababize ngokuthi bayizinja. Impendulo ngayiphiwa eGuta Ra Mwari.
Okunye engilokhu ngisakufunda yikusebenza koMoya Oyingcwele, engingazange ngikwazi ukuthi ubanzi kanjani, ngaze ngangena eGuta Ra Mwari.
Ngiyakunxusa ukuthi ufunde lawe ngobubanzi bawo kulolugwalo.

Dettagli