Le changement de la face de la Cour ne m'a point changé la volonté. Quoy que les choses paroissent autres qu'elles n'estoient, vous estes à mes yeux le mesme que vous estiez. Ce n'estoit pas vostre fortune qui m'attiroit à vous, et par consequent je cherche encore vostre personne ; En quelque lieu qu'elle se soit retirée, elle y a porté l'objet de mon affection et de mon estime. La vertu et le bon esprit ne sont point des pieces de la Faveur : Ce ne sont point des biens qui se puissent perdre : On les conserve quand tout est perdu : Ils ont suivy en exil les Grands Personnages, et leur ont tenu compagnie dans la prison. Puis que ces fondemens de nostre societé subsistent, il me semble, MONSEIGNEUR, que nostre commerce ne doit pas cesser ; Il est vray que j'apprehende qu'il sera plus difficile qu'il n'eust esté en une saison plus calme. Le Desordre commence de tous costez, et les Papiers que je croyois vous envoyer à Paris, par une voye asseurée, je les recommande au Hazard, pour vous les rendre je ne sçay où.
Si j'eusse esté en estat de vous aller faire ma cour, quand vous estiez en Guyenne avec leurs Majestez, vous auriez esté Parrain de mon Livre, et il porteroit le nom que vous luy auriez donné. A dire le vray, j'ay peur que celuy de Socrate soit trop illustre pour luy. Ce que je respondray à ceux qui me chicaneront là-dessus, c'est que cette imposition de nom n'a pas esté de mon choix. Quelques-uns l'ont voulu ainsi, et je n'ay pas pu les contredire. On vous a dit ma mauvaise honte et le peu de force que j'ay contre mes Amis : Ils m'ont remonstré qu'il y avoit eu plusieurs Socrates ; que le second n'offensa point le premier de prendre son nom ; que tous les Socrates n'avoient pas esté si honnestes gens que Socrate le Philosophe. Témoin Socrate l'Historien, qui fut suspect d'Heresie ; peu estimé d'ailleurs pour son stile, par Photius, Patriarche de Constantinople, et qui peut-estre ne parloit pas mieux Grec que mon Socrate parle François.